شیخ رشید نے ڈالر کی اڑان کا ذمہ دار سابق حکومتوں کو قراردیدیا
لاہور ( 92 نیوز) شیخ رشید نے ڈالر کی بڑھتی قیمت کاذمہ دار سابقہ حکومتوں کو قرار دے دیا، وزیر ریلوے نے نیوز کانفرنس میں کہا کہ سابق حکومت کے گند کے باعث ڈالر کی یہ حالت ہے،وزیراعظم عمران خان چوروں کی بھل صفائی کر رہے ہیں، سارے چور اکٹھے ہو رہے ہیں، اپوزیشن کو عید کے بعد نکلنے دیں ان کو پتا چل جائے گا۔
وزیر ریلوے نے میڈیا سے گفتگو کرتے ہوئے کہا کہ عید کے موقع پر 5 عید اسپیشل ٹرینیں چلائیں گے،30 جون کو لاہور میں ہی پریس کانفرنس کریں گے،ممکن ہے 15 جون کو عمران خان نئی ٹرین کا افتتاح کریں ۔
شیخ رشید نے کہا کہ ٹکٹ نہ لینے والوں سے ایک کروڑ 20 لاکھ کی ریکوری کی ہے، ریلوے اسٹیشنز پر ایک ہزار سٹالز لگانے کا فیصلہ کیا ہے ،میں دو روز لاہور ہیڈ کوارٹرز میں موجود رہوں گا۔
انہوں نے بتایا کہ ایک مہینے میں کے سی آر کلیئر کر دیں گے ، 60 سے 65 روپے میں ہائی ٹی کے لیے ٹینڈرز کا حکم دیا ہےل ، 21 اور 20 گریڈ کے افسران سے تھک گیا ہوں 18 اور 19 گریڈ کے افسران کو چارج دینا چاہتا ہوں۔