آرمی چیف جنرل عاصم منیر سے مالدیت کے چیف آف ڈیفنس فورسز کی ملاقات
اسلام آباد: (92 نیوز) مالدیپ کی مسلح افواج کے چیف آف ڈیفنس فورسز (سی ڈی ایف) میجر جنرل ابراہیم ہلمی نے جنرل ہیڈ کوارٹرز راولپنڈی میں چیف آف آرمی اسٹاف جنرل سید عاصم منیرسے ملاقات کی۔
ملاقات کے دوران دوطرفہ دفاعی تعاون اور علاقائی سلامتی کی حرکیات سمیت باہمی دلچسپی کے امور پر تفصیلی تبادلہ خیال کیا گیا۔ دونوں اطراف نے پاکستان اور مالدیپ کے درمیان بھائی چارے اور دوستی کے پائیدار بندھنوں پر اطمینان کا اظہار کرتے ہوئے اہم علاقائی امور پر اپنے مشترکہ نقطہ نظر پر زور دیا۔
یہ بھی پڑھیں: آرمی چیف کی زیر صدارت کور کمانڈرز کانفرنس: پاکستان کے دفاع کا اعادہ
ابھرتے ہوئے سیکورٹی کے منظر نامے کو تسلیم کرتے ہوئے، دونوں فوجی رہنماؤں نے باہمی دلچسپی کے شعبوں میں تعاون کو بڑھانے کے مقصد سے دوطرفہ تعلقات کو مضبوط بنانے اور ان کی بحالی کے اپنے عزم کا اعادہ کیا۔
معزز مہمان نے پاک فوج کی غیر معمولی پیشہ ورانہ مہارت، لگن اور علاقائی استحکام کے لیے کردار کو سراہا۔