کابل، دہشتگردوں کا مارشل فہیم نیشنل ڈیفنس یونیورسٹی پر حملہ، 11افراد ہلاک
کابل (92 نیوز) افغان دار الحکومت کابل میں دہشتگردوں نے مارشل فہیم نیشنل ڈیفنس یونیورسٹی پر حملہ کر دیا ۔
ایک ہی روز کے وقفے سے افغان دار الحکومت کابل پر دوسرا بڑا حملہ پیش آیا ۔ خودکش جیکٹوں اور آٹو میٹک اسلحہ سے لیس پانچ دہشت گردوں نے مارشل فہیم نیشنل ڈیفنس یونیورسٹی پر دھاوا بول دیا ۔ اس دوران پورا علاقہ فائرنگ اور دھماکوں سے گونجتا رہا ۔
حملے کے فوری بعد افغان سیکیورٹی فورسز نے فوری طور پر علاقے کو گھیرے میں لے لیا،، پانچ سے چھ گھنٹے تک جاری رہنے والی کارروائی میں 4 دہشتگردوں کو ہلاک جبکہ ایک کو زندہ گرفتار کرلیا گیا ۔ حملے میں افغان نیشنل آرمی کے 11 اہلکار ہلاک جبکہ 16 زخمی بھی ہوئے ۔
دہشت گرد تنظیم داعش نے ملٹری یونیورسٹی حملے کی ذمہ داری قبول کرلی ہے ۔
دس روز کے دوران یہ افغان دارالحکومت میں ہونے والا تیسرا بڑا حملہ ہے ، جو ایسے موقع پر ہوا جب انڈونیشیا کے صدر کابل پہنچے ہیں ۔