پاک آسٹریلیا سیریز، پاکستانی باؤلرز بری طرح ناکام رہے
دبئی ( 92 نیوز ) پاک آسٹریلیا سیریز کے دوران قومی باؤلرز کی کارکردگی بالکل ناقص رہی ۔ پاکستان نے پانچ میچز کی سیریز میں 10 باؤلرز کی خدمات حاصل کیں ۔
پہلے میچ میں پاکستان نے آسٹریلیا کو 281 رنز کا ہدف دیا۔ پاکستان کی جانب سے محمد عامر ، محمد عباس، عماد وسیم ، فہیم اشرف ، یاسر شاہ اور کپتان شعیب ملک نے باؤلنگ کا مظاہرہ کیا مگر آسٹریلوی بلے بازوں کو قابو نہ کر سکے ۔
باؤلرز نے 49 اوورز پھینکے اور صرف دو وکٹیں حاصل کیں ۔محمد عامر ، عماد وسیم ، یاسر شاہ اور شعیب ملک وکٹ حاصل کرنے میں ناکام رہے
دوسرے میچ میں پاکستان نے مہمان ٹیم کو 285 رنز کا ہدف دیا ، باؤلر ز اس بار بھی آسٹریلوی بلے بازوں کی پیش قدمی نہ روک سکے ۔
دوسرے میچ میں محمد عامر کی جگہ حارث سہیل نے باؤلنگ کا مظاہرہ کیا ۔ اس میچ میں پاکستانی باؤلرز نے 47.5 اوورز پھینکے اور صرف دو وکٹیں ہی حاصل کر سکے ۔ عماد وسیم اور یاسر شاہ نے ایک ایک کھلاڑی کو آؤٹ کیا ۔
محمد عباس ، فہیم اشرف ، محمد حسنین اور حارث سہیل کوئی وکٹ نہ لے سکے ۔
تیسرے میچ میں آسٹریلیا نے پہلے کھیلتےہوئے 266 رنز بنائے۔ عثمان شنوری ، جنید خان ،یاسر شاہ ،عماد وسیم اور حارث سہیل نے ایک ایک کھلاڑی کو آؤٹ کیا جبکہ محمد حسنین کوئی وکٹ نہ لے سکے ۔
چوتھے میچ میں بھی آسٹریلیا نے پہلے بیٹنگ کی اور 277 رنز بنائے ۔ محمد حسنین ،عماد وسیم اور یاسر شاہ نے دو دو وکٹیں حاصل کیں جب کہ عثمان شنواری ،جنید خان اور حارث سہیل کوئی وکٹ حاصل نہ کر سکے ۔
پانچویں میچ میں بھی محمد عباس ، عماد وسیم ، یاسر شاہ اور حارث سہیل کوئی جادو نہ جگا سکے ۔
عثمان شنواری نے 4 اور جنید خان نے 3 وکٹیں حاصل کیں ۔