پنجاب میں 25 مئی واقعات پر ایکشن، 12 ایس ایچ اوز معطل
لاہور (92 نیوز) - پنجاب حکومت نے 25 مئی کے واقعات میں ملوث پولیس افسروں کے خلاف کارروائی شروع کردی۔
مجھے میرے چیف منسٹر پنجاب کا حکم ملا ہے جس نے بھی مئی کے مہینے میں آئین اور قانون شکنی کی ہے اس کو نہئیں چھوڑا جاے گا
— Col (R) Muhammad Hashim| Home Minister Punjab. (@ColhashimDogar) August 10, 2022
وزیرداخلہ پنجاب کرنل ریٹائرڈ ہاشم ڈوگر کا کہنا ہے بارہ ایس ایچ اوز معطل کرکے انکوائری کا آغاز کردیا۔ انہوں نے کہا کہ پارلیمنٹ لاجز میں چھپے لوگوں کا جلد پنجاب میں استقبال کریں گے، نون لیگ کے جن رہنماؤں کےخلاف درخواستیں ہیں، ان پر قانون اپنا راستہ بنائے گا۔
کرنل (ر) ہاشم ڈوگر نے کہا کہ نوازشریف اور خواجہ آصف کے اداروں کے خلاف بیان سب کے سامنے ہیں۔ اداروں کی طرف سے کہا گیا تو نوازشریف اور دیگر کے خلاف کارروائی کریں گے۔
میڈیا سے گفتگو میں وزیرداخلہ پنجاب نے کہا معطل کیے گئے ایس ایچ اوز کے نام جلد منظر عام پر آ جائیں گے۔
دوسری جانب متعدد پولیس افسران کے تقرروتبادلے بھی کر دئیے گئے، ڈی آئی جی کیپٹن ریٹائرڈ سہیل چودھری کو پنجاب سے ریلیو کردیا گیا جو 25 مئی کو ڈی آئی جی آپریشنز لاہور تعینات تھے۔
کامران عادل کو ڈی آئی جی انویسٹی گیشن کے عہدے سے ہٹا کر ڈی آئی جی لیگل تعینات کر دیا گیا۔
ڈی آئی جی انویسٹی گیشن لاہور کی ذمہ داریاں اطہر اسماعیل کے سپرد کر دی گئیں، آر پی او گوجرانوالہ بھی تبدیل کر دئیے گئے، ڈاکٹر عابد کو ہٹا کر منیر مسعود مارتھ کو آر پی گوجرانوالہ تعینات کیا گیا ہے۔