پارلیمنٹ اور پی ٹی وی حملہ کیس: پی ٹی آئی کے چھے رہنماؤں کی ضمانتیں منظور
اسلام آباد (92 نیوز) پارلیمنٹ اور پی ٹی وی حملہ کیس میں تحریک انصاف کے چھے رہنماؤں کی ضمانتیں منظور کر لی گئیں ۔
انسداد دہشتگردی عدالت کے جج شاہ رخ ارجمند نے پارلیمنٹ اورسرکاری ٹی وی پر حملہ کیس کی سماعت کی ۔
تحریک انصاف کے رہنماء شاہ محمود قریشی ، شفقت محمود ، عارف علوی ، اسد عمر اور شیریں مزاری عدالت میں پیش ہوئے ۔
پراسیکیوٹر چوہدری شفقات نے دلائل دیئے کہ 2014 کے دھرنے میں لوگوں کے قتل کی ذمہ داری بھی پی ٹی آئی قیادت پر آتی ہے ۔ تحریک انصاف کے رہنماء اپنے ساتھ مسلح لوگ لے کر آئے ۔ ملزمان کی عبوری ضمانت منسوخ کر کے گرفتاری کا حکم دیا جائے ۔
پراسیکیوٹر کے دلائل کے دوران شیریں مزاری توبہ توبہ کرتی رہیں ۔ پولیس کی جانب سے کہا گیا کہ شیریں مزاری بھی قصور وار ہیں ۔ انہیں گرفتار کر لیتے ہیں ۔
تحریک انصاف کے رہنماﺅں کے وکیل نے کہا کہ احتجاج کرنے والے پرامن مظاہرین کے خلاف مقدمات درج کئے گئے ۔ نامزد ملزمان قومی اسمبلی کے رکن ہیں ۔
عدالت نے محفوظ کیا گیا فیصلہ سناتے ہوئے تحریک انصا ف کے رہنماﺅں کی ضمانت منظور کر لی جبکہ شیریں مزاری کو بے قصور قرار دیدیا ۔
سماعت کے بعد میڈیا سے گفتگو میں شاہ محمود قریشی نے نواز شریف کو آڑے ہاتھوں لیا اور بولے نواز شریف عدلیہ کو متنازعہ بنا رہے ہیں ۔
تحریک انصاف کے رہنماء نے یہ بھی کہا کہ سرکاری وکیل نے من گھڑت الزامات لگائے ۔ مقدمہ سیاسی بنیادوں پر بنایا گیا ۔ انتقام کا نشانہ بنایا جا رہا ہے ۔ ضمانتیں منظور ہونے پر خوشی ہے ۔