یاسر شاہ پر قسمت کی دیوی مہربان، بیٹنگ میں 5 بار مواقع ملے
ایڈیلیڈ ( 92 نیوز) کہتے ہیں قسمت بھی بہادروں کا ساتھ دیتی ہے ، یہ مثال پاکستانی اسپنر یاسر شاہ پر صادق آتی ہے ، ایڈیلیڈ ٹیسٹ کی پہلی اننگز میں کیرئیر کی پہلی سنچری بنانے والے یاسر شاہ کا قسمت نے خوب ساتھ دیا ، اسپنر کو ایک نہیں ،دو نہیں پانچ پانچ مواقع ملے۔
جو کام پاکستان ٹیم کا ٹاپ آرڈر ، مڈل آرڈر نہ کر سکا وہ ٹیل اینڈر ز پر کھیلنے والے یاسر شاہ نے کر دکھایا ، یاسرشاہ باؤلنگ میں کارکردگی تو نہ دکھا سکے لیکن بیٹنگ میں ان کا بلا خوب چلا ، یاسر شاہ نے حریف باؤلرز کو تگنی کا ناچ نچائے رکھا۔
یاسر شاہ نے عمدہ بیٹنگ کرتے ہوئے 12چوکوں کی مدد سے سنچری مکمل کی ، پاکستانی اسپنر آٹھویں نمبر پر سنچری اسکور کرنے والے چوتھے اور آسٹریلیا میں اسی نمبر پر سنچری کرنیوالے پہلےپاکستانی بلے باز بھی بن گئے ہیں۔