کورونا وائرس سے مزید 23 پاکستانی جاں بحق ،1637 کیسز رپورٹ
اسلام آباد(92 نیوز)پاکستان میں کورونا وائرس کی دوسری لہر خطرناک ہونے لگی ، گزشتہ روز 23 افراد جاں بحق ہوگئے جب کہ 1637 نئے کیسز سامنے آئے ۔ فعال کیسز کی تعداد ایک بار پھر 20 ہزار سے تجاوز کر گئی ،گذشتہ روز 31 ہزار 904 افراد کے ٹیسٹ کیے گئے ۔
نیشنل کمانڈ اینڈ آپریشن سنٹر کے مطابق گذشتہ روز کورونا وائرس کے 1637 نئے کیسز رپورٹ ہوئے جبکہ 23 افراد جان کی بازی ہار گئے ۔اموات کی مجموعی تعداد 7 ہزار ہو گئی جبکہ صحتیاب ہونے والے مریضوں کی تعداد 3 لاکھ 19 ہزار 431 ہے ،ملک بھر میں ایکٹو کیسز 20 ہزار 45 تک پہنچ گئے ۔
ترجمان کا کہنا ہے ملک بھر میں کورونا وائرس کے مریضوں کی تعداد 3 لاکھ 46 ہزار 476 ہو گئی ،سندھ میں مریضوں کی تعداد ایک لاکھ 50 ہزار 834 ، پنجاب میں 1 لاکھ 7 ہزار 329 ، خیبر پختونخوا میں 40 ہزار 843 ، بلوچستان میں 16 ہزار 152 ، اسلام آباد میں 22 ہزار 110 ، آزاد جموں و کشمیر میں 4830 اور گلگت بلتستان میں 4378 ہے ۔
ترجمان کے مطابق گذشتہ روز 31 ہزار 904 افراد کے ٹیسٹ کیے گئے ، ملک بھر میں اب تک 47 لاکھ 41 ہزار 507 افراد کے ٹیسٹ کیے جا چکے ہیں ۔736 اسپتالوں میں کورونا مریضوں کے لیے سہولیات دستیاب ہیں ۔
اسپتالوں میں کورونا وینٹی لیٹرز کی تعداد 1855 ہے جبکہ 1181 مریض مختلف اسپتالوں میں زیر علاج ہیں ۔