کورونا 192 ممالک میں پھیل گیا، ہلاکتوں کی تعداد 14ہزار 654 ہو گئی
اسلام آباد ( 92 نیوز) جان لیوا کورونا وائرس دنیا کے 192 ممالک میں پھیل گیا ، ہلاکتیں14 ہزار 703 ہوگئیں، متاثرین تین لاکھ 37 ہزار سے بڑھ گئے، اٹلی میں مزید 655 افراد ہلاک ہو گئے ۔
کورونا وائرس نے ساری دنیاکو اپنے نرغے میں لے رکھا ہے ، آج دن کے آغاز پر موصول ہونے والی اطلاعات کے مطابق 65 افراد کورونا وائرس سے ہلاک ہو چکے ہیں ۔ صرف امریکا میں 38 افراد ہلاک ہوئے ۔
امریکا میں آج کی تاریخ میں 38 افراد ہلاک ہو چکے ہیں ،ملک بھر میں اموات کی کل تعدا د 457 ہے ، آج کے دن میں 1355 افراد میں کورونا وائرس کی تصدیق ہوئی جس کے بعدکل کیسز کی تعداد 34 ہزار 901 ہو گئی ۔
چین میں آج 9 افراد موت کی وادی میں چلے گئے جس کے بعد ملک بھر میں ہلاکتوں کی کل تعداد 3 ہزار 270 ہو گئی۔ آج 39 نئے کیسز رپورٹ ہونے کے بعد مجموعی کیسز کی تعداد 81 ہزار 93 تک جا پہنچی ۔
فلپائن میں آج پھر 8 افراد زندگی کی بازی ہا رگئے ، اب تک 33افراد کورونا وائرس کا شکار ہو کر لقمہ اجل بن چکے ہیں، آج ملک میں 16 افراد میں موذی مرض کی تشخیص ہوئی ، ٹوٹل 396 افراد وائرس کا شکار بن چکے ہیں ۔
جنوبی کوریا میں بھی 7 زندگیاں کورونا وائرس کی بھینٹ چڑھ گئیں ، ملک میں مجموعی ہلاکتوں کی تعداد 111 تک پہنچ چکی ہے جبکہ 64 نئے کیسز سامنے آنے کے بعد 8 ہزار 961 مریض ہو چکے ہیں۔
بھارت میں آج ایک شخص کورونا وائرس سے ہلاک ہوا ، بھارت میں ہلاکتوں کی کل تعداد 8 ہے جبکہ آج رپورٹ ہونے والے 29 کیسز کے بعد مجموعی تعداد425 ہو گئی ہے ۔ مونٹینگرو میں بھی ایک شخص کورونا وائرس کے باعث ہلاک ہو گیا۔