کل سے متحدہ عرب امارات کیلئے پی آئی اے کا فضائی آپریشن بحال ہو جائے گا
کراچی (92 نیوز) کل سے متحدہ عرب امارات کیلئے پی آئی اے کا فضائی آپریشن بحال ہو جائے گا۔ ٹکٹوں کی فروخت شروع ہو گئی۔
پی آئی اے پہلے متحدہ عرب امارات میں پھنسے پاکستانیوں کو واپس لانے کیلئے یک طرفہ پروازیں چلا رہا تھا، اب مسافر پی آئی اے کے ذریعے پاکستان سے دبئی، شارجہ، ابوظہبی اور العین کا سفر کرسکیں گے۔ پرواز کی روانگی کے 48 گھنٹوں کے اندر مسافروں کو لازماً کورونا ٹیسٹ کروا کر منفی رپورٹ بورڈنگ کے وقت پیش کرنا ہو گی۔ متحدہ عرب امارات پہنچنے سے پہلے مسافروں کو ہیلتھ ڈیکلیریشن فارم بھی بھرنا ہو گا۔
ترجمان پی آئی اے کا کہنا ہے ٹکٹوں کی فروخت کا آغاز ہوگیا ہے جو پی آئی اے کے دفاتر کے علاوہ ویب سائٹ اور ایجنٹس سے بھی حاصل کئے جا سکتے ہیں۔
