کشمیری عوام ایک ماہ سے گھروں میں محصور ہیں،فردوس عاشق اعوان

اسلام آباد (92 نیوز) معاون خصوصی اطلاعات ڈاکٹر فردوس عاشق اعوان نے کہا کہ کشمیری عوام ایک ماہ سے گھروں میں محصور ہیں۔ بھارت نے مقبوضہ وادی کو دنیا کی سب سے بڑی جیل میں تبدیل کر دیا۔ بین الاقوامی اسلامی یونیورسٹی میں کشمیر سیمینار سے خطاب کرتے ہوئے  ڈاکٹر فردوس عاشق اعوان کا کہنا تھا کہ کشمیریوں کے لیے آواز کبھی بند نہیں ہوگی۔ اس بار چھ ستمبر کو کشمیر ڈیفنس ڈے کے طور بار منایا جائے گا۔ کشمیر پاکستان کا دفاعی حصار ہے۔ معاون خصوصی اطلاعات کا کہنا تھا حکومت مسئلہ کشمیر کے حل کے لیے سنجیدہ اقدامات کر رہی ہے ۔ دنیا بھارت کے خلاف آواز بلند کرے ۔ کشمیریوں کی آواز کو ہر سطح پر اٹھائیں گے ۔ اس موقع پر اسلامی یونیورسٹی کے صدر ڈاکٹر احمد یوسف الدرویش نے کہا پوری مسلم امت کشمیریوں کے ساتھ کھڑی ہے ۔ کشمیریوں نے ڈٹ کر بھارتی مظالم کا مقابلہ کر کے جرات اور بہادری کا ثبوت دیا ہے۔