کروڑوں کی کرپشن‘ سیکرٹری خزانہ بلوچستان 14روزہ جسمانی ریمانڈ پر نیب کے حوالے

کوئٹہ (92نیوز) احتساب عدالت نے سیکرٹری خزانہ بلوچستان کو 14 روزہ جسمانی ریمانڈ پر نیب کے حوالے کر دیا۔ تفصیلات کے مطابق عوام کے خزانے کو گھر میں چھپانے والے سیکرٹری خزانہ بلوچستان مشتاق رئیسانی کو آج احتساب عدالت میں پیش کر دیا گیا۔ گزشتہ روز نیب کی کارروائی میں مشتاق رئیسانی کے گھر سے کالے دھن سے کمائے 63کروڑ سے زائد مالیت کی کرنسی‘ سونا اور پرائز بانڈ ملے تھے۔ ان پر ایک ارب سے زائد کی کرپشن کا الزام ہے۔ پیشی کے موقع پر احتساب عدالت نے ان کا 14 روزہ جسمانی ریمانڈ دے دیا اور انہیں نیب کے حوالے کرنے کا حکم دیا۔ اس موقع پر عدالت نے ریمارکس دیے کہ نیب کی کارکردگی قابل ستائش ہے۔ کیس کی شفاف تحقیقات کی جائیں اور حقائق سامنے لائے جائیں۔ قبل ازیں نیب کے وکیل نے مشتاق رئیسانی کے 14روزہ جسمانی ریمانڈ کی درخواست کی تھی جو عدالت نے منظور کر لی۔