کرتار پور راہداری سکھ یاتریوں کیلئے کھول دی گئی
نارووال ( 92 نیوز ) کرتار پور راہداری سکھ یاتریوں کیلئے کھول دی گئی ، سکھ یاتری کرتار پور راہداری سے پاکستان میں داخل ہو گئے ، سابق بھارتی وزیر اعظم منموہن سنگھ اور بھارتی پنجاب کے وزیر اعلیٰ امریندر سنگھ وفود کے ہمراہ کرتار پور راہداری سے پاکستان میں داخل ہو گئے ۔
منموہن سنگھ اور امریندر سنگھ کرتارپور زیرو پوائنٹ سے راہداری کے راستے پاکستان میں داخل ہوئے ، سکھ یاتریوں کی بڑی تعداد بھی انکے ہمراہ ہے ۔
پاکستان پہنچنے پر بھارتی پنجاب کے وزیر اعلیٰ امریندر سنگھ نے کہا کہ گورودوارہ کھولنے کامطالبہ 70 سال سے تھا ، آج ہماری دیرینہ خواہش پوری ہو گئی ، گورودوارہ کھولنا ایک اچھی شروعات ہے ۔
سابق بھارتی وزیر اعظم منموہن سنگھ نے کہا کہ راہداری کھولنے سے پاک بھارت تعلقات بہتر ہوں گے۔
اس موقع پر سکھ برادری بھی بہت خوش نظر آئی ، انہوں نے کہا کہ بابا گورو نانک کے گورو دوارے جانا بہت بڑی خواہش تھی ،وزیر اعظم عمران خان کا نام تاریخ میں سنہرے حروف سے لکھا جائیگا۔