کراچی میں نشتر پارک سے برآمد ہونیوالا جلوس حسینیہ ایرانیاں پہنچ کر اختتام پذیر

کراچی ( 92 نیوز) کراچی میں بھی میدان کربلا میں اسلام کی خاطرعظیم قربانیوں کو عقیدت و احترام سے یاد کیا گیا ، اس سلسلے میں مرکزی جلوس نشترپارک سے برآمد ہوا  جو مقررہ راستوں سے ہوتا ہوا بخیرو عافیت کھارادر میں حسینیہ ایرانیاں پہنچ کر اختتام پذیر ہوگیا ۔

شہدائے کربلا کی عظیم قربانیوں کو خراج عقیدت پیش کرنے کیلئے  یوم عاشور پر کراچی میں مرکزی جلوس نشترپارک سے برآمد ہوا  ۔ جس میں ہزاروں عزاداروں نے شرکت کی ۔

جلوس کے شرکاء کیلئے مقررہ راستوں پر پانی کی سبیلیں بھی لگائی گئی تھیں جبکہ ٹرکوں کے

ذریعے بھی عزاداروں کو پانی اور شربت کی فراہمی کی جاتی رہی ۔

مرکزی جلوس کی حفاظت کیلئے پولیس کے 6 ہزار سے زائد افسران و اہلکار تعینات اور ریپڈ رسپانس فورس کی 3 کمپنیاں بھی موجود تھیں جبکہ ڈی جی  رینجرز اور آئی جی سندھ نے بھی سکیورٹی انتظامات کا جائزہ لیا ۔

جلوس کے شرکاء صدر اور ایمپریس مارکیٹ سے ہوتے ہوئے تبت سینٹر کے مقام پر پہنچے جہاں نماز ظہرین ادا کی گئی  ، جس کے بعد مرکزی جلوس ایک مرتبہ پھرمقررہ راستوں کی جانب رواں دواں ہوا اور کھارادر میں امام بارگاہ حسینیہ ایرانیاں پہنچ کر اختتام پذیر ہوا ۔