کراچی برائیڈل فیشن ویک کا پہلا روز‘ معروف ڈیزائنرز کے تیارکردہ ملبوسات کی نمائش

کراچی (92نیوز) کراچی میں برائیڈل فیشن ویک کا میلہ سجا جس میں ماڈلز نے معروف ڈیزائنرز کے ملبوسات زیب تن کرکے ریمپ پر جلوے بکھیرے تو حدیقہ کیانی نے آواز کا جادو جگایا۔ تفصیلات کے مطابق برائیڈل فیشن ویک کا پہلا روزشروع ہوا تو ہر جانب رنگ و نور کی بارش اور حسن کے جلوے نظر آئے۔ ملبوسات ایسے کہ دیکھنے والے دنگ رہ جائیں۔ ایسے میں حدیقہ کیانی کی آواز نے شو میں چار چاند لگا دیے۔ لاہور سے آئی مہمان ڈیزائنر مریم نے قدیم دور کے ملبوسات کو جدت کا رنگ دیا۔ ریمپ پر دلہن بنی ماڈلز نے اپنی اداوں سے خوب داد سمیٹی۔ حاضرین کا کہنا تھا کہ جلوے بکھیرتے برائیڈل فیشن ویک میں پیش کئے گئے ملبوسات فیشن انڈسٹری میں ایک نیا ٹرینڈ متعارف کرائیں گے۔