ڈینگی مچھر کے وار لگاتار، جڑواں شہروں میں 69 نئے کیسز سامنے آ گئے

اسلام آباد (92 نیوز) ڈینگی مچھر اسلام آباد اور راولپنڈی کی انتظامیہ کے قابو میں نہ آسکا۔ جڑواں شہروں میں گزشتہ چوبیس گھنٹوں میں 69 نئے کیسز سامنے آ گئے۔

ڈسٹرکٹ ہیلتھ آفیسر کا کہنا ہے کہ اسلام آباد کے دیہی علاقوں میں 38 اور شہری علاقوں میں 16 نئے کیسز رپورٹ ہوئے۔ اسلام آباد بھر میں 4 ہزار 4 سو 75 افراد ڈینگی کا شکار ہیں جن میں سے دیہی علاقوں میں 2 ہزار 5 سو 55 جبکہ شہری علاقوں میں 1 ہزار 9 سو 20 مریض شامل ہیں۔

محکمہ صحت کے مطابق 15 مریض راولپنڈی کے الائیڈ اسپتالوں میں داخل ہیں۔ ہولی فیملی میں 6، بینطیر اسپتال میں 5، ڈی ایچ کیو اسپتال میں 4 مریض داخل کرائے گئے ہیں۔ رواں سال راولپنڈی میں ڈینگی سے متاثرہ مریضوں کی مجموعی تعداد 3285 ہو گئی ہے۔

ذرائع کا کہنا ہے کہ ڈینگی کے 5 مریض تشویشناک حالت میں ہولی فیملی اسپتال میں زیر علاج ہیں۔