ڈیفنس خیابان بدر میں دکان میں کمپریسر پھٹ گیا، پانچ افراد زخمی
کراچی ( 92 نیوز ) کراچی کے علاقے ڈیفنس خیابان بدرمیں دکان میں کمپریسر پھٹ گیا جس سے پانچ افراد زخمی ہو گئے ۔
ڈیفنس خیابان بدر میں صبح سویرے ہیر ڈریسر کی دکان میں اچانک کمپریسر پھٹنے سے زور دار دھماکا ہوا، دھماکے میں 5 افراد زخمی ہوئے، جن میں سے 3 کی حالت تشویشناک بتائی جارہی ہے ۔
دھماکے کے باعث دکان مکمل طور پر تباہ ہوگئی، جبکہ اطراف کی دکانوں اور قریب کھڑی گاڑیوں اور موٹرسائیکلوں کو بھی نقصان پہنچا ۔
دھماکے کے بعد پولیس اور بم ڈسپوزل اسکواڈ موقع پر پہنچ گیا، جائے وقوعہ پر سرچنگ کا عمل جاری ہے ۔
ایس ایس پی ساؤتھ شیراز نذیر کے مطابق کمپریسر سے پہلے گیس لیکیج ہوئی ، جس کےبعد سلنڈر زور دار دھماکے سے پھٹ گیا، دھماکے کی زد میں آکر پانچ افراد زخمی ہو گئے ۔
امدادی کارکنوں نے زخمیوں کو جناح اسپتال منتقل کر دیا ، جہاں انہیں طبی امداد فراہم کی جا رہی ہیں ۔