ڈی جی خان میں مخبری کے شبے پر ایک شخص کو بازو اور ناک کاٹ کر قتل کر دیا گیا
ڈی جی خان (92 نیوز) ڈی جی خان میں انسانیت سوز واقعہ پیش آیا۔ جرائم پیشہ گروہ نے مخبری کے شبے پر ایک شخص کو بازو اور ناک کاٹ کر قتل کر دیا جبکہ دوسرے شخص کو فائرنگ سے قتل کر دیا۔
وزیر اعلی پنجاب سردار عثمان بزدار نے اندوہناک واقعہ پر سخت نوٹس لیا۔ انسپکٹر جنرل پولیس سے رپورٹ طلب کرتے ہوئے ملزمان کی فوری گرفتاری کا حکم دے دیا۔
وزیر اعلی پنجاب کے نوٹس پر پولیس اور قانون نافذ کرنے والے ادارے بھی متحرک ہو گئے ۔ ٹیمیں تشکیل دے کر ملزمان کی گرفتاری کے لئے چھاپے مارنے شروع کر دیے گئے ہیں۔ معاون خصوصی اطلاعات پنجاب فردوس عاشق اعوان نے واقعہ پر افسوس کا اظہار کرتے ہوئے کہا کہ واقعہ کے ملزمان کو کٹہرے میں لائیں گے۔
وزیر اعلیٰ سردار عثمان بزدار کا کہنا ہے کہ واقعہ میں ملوث سفاک قاتل قانون کی گرفت سے نہیں بچ سکیں گے ۔ مقتولین کے لواحقین کو انصاف کی فراہمی یقینی بنائی جائے گی۔
