چین سے تجارتی ، اقتصادی اور سی پیک بارے تفصیلی گفتگو ہوئی ، شاہ محمود قریشی
بیجنگ ( 92 نیوز ) وزیر خارجہ شاہ محمود قریشی نے وزیر اعظم عمران خان کے دورہ چین کے حوالے سے کہا کہ چین کی قیادت سے تجارتی ، اقتصادی اور سی پیک سےمتعلق تفصیلی گفتگو ہوئی ۔
بیجنگ میں گفتگو کرتے ہوئے وزیر خارجہ کا کہنا تھا کہ چین نے اقوام متحدہ کی جنرل اسمبلی میں کشمیر سے متعلق بات کی اور تشویش کا اظہار کیا ، چین کے صدر کی غیر رسمی دورہ بھارت سے قبل خواہش تھی کہ ہماری قیادت سے ملاقات ہو اور دونوں ممالک ایک دوسرے کو اعتماد میں لیں ۔
شاہ محمود قریشی نےبتایا کہ چینی قیادت سے دورہ بھارت کے بعد دوبارہ رابطہ ہو گا ، وہ ہمیں بااخبر رکھیں گے ، وزیر اعظم عمران خان کا گزشتہ 13 ماہ میں یہ تیسرا دورہ چین ہے ، ہماری خواہش ہے کہ چین کی قیادت بھی پاکستان آئے ۔
انہوں نے بتایا کہ ہماری چین کے وزیر اعظم کے ساتھ دو ملاقاتیں ہوئیں اور وفود کی سطح پر بھی مذاکرات ہوئے جن میں تجارتی و اقتصادی تعاون کے فروغ اور سی پیک سے متعلق تفصیلی گفتگو ہوئی ، ہم نے دو طرفہ اقتصادی تعاون کو فروغ دینے پر بھی تبادلہ خیال کیا۔
وزیر خارجہ نے کہا کہ بہت سے مفاہمتی یاداشتوں پر دستخط ہوئے ، پانی کے مسئلے پر ایک ڈی سیلینیشن پلانٹ لگانے کا فیصلہ بھی کیا گیا ، گوادر بھی اس منصوبے سے مستفید ہو گا جب کہ تعلیم کے شعبے سے متعلق بھی ایم او یو پر دستخط کئے گئے ۔