چیف جسٹس کا کورونا پر اقدامات، اسپتالوں میں سہولیات فراہمی پر ازخود نوٹس
اسلام آباد (92 نیوز) چیف جسٹس آف پاکستان نے کورونا وائرس سے نمٹنے کیلئے اقدامات اور اسپتالوں میں سہولیات کی فراہمی پر ازخود نوٹس لے لیا، وفاقی اور صوبائی حکومت سے جواب طلب کرلیا۔
کورونا وائرس کے حوالے سے اقدامات پر چیف جسٹس آف پاکستان نے پہلا ازخود نوٹس لے لیا۔ کورونا وائرس سے نمٹنے کیلئے کیا حکمت عملی بنائی گئی؟اسپتالوں میں کیا سہولیات فراہم کی گئیں؟۔ بارڈرز پر آمدورفت روکنے اورقرنطینہ سینٹرزبنانے کے لیے کیا اقدامات اٹھائے گئے؟ جسٹس گلزاراحمد نے وفاقی اورصوبائی حکومتوں سے جواب طلب کرلیا۔
چیف جسٹس پاکستان کی سربراہی میں پانچ رکنی لارجربنچ 13 اپریل کوسماعت کرے گا۔ عدالت نے اٹارنی جنرل، سیکرٹری صحت، سیکرٹری داخلہ کو نوٹسز جاری کردیئے۔
عدالت نے چاروں صوبائی حکومتوں سمیت گلگت بلستان کی حکومت سے بھی اقدامات بارے تفصیلات طلب کرلیں۔ صوبائی حکومتوں کے ایڈووکیٹ جنرلزاور چیف سیکرٹریزکو بھی نوٹسز جاری کیے گئے ہیں۔
