پی ڈی ایم کی کشتی سے مانگے تانگے کے ملاحوں نے چھلانگیں لگانا شروع کر دیں، فردوس عاشق
لاہور (92 نیوز) وزیر اعلیٰ پنجاب کی معاون خصوصی ڈاکٹر فردوس عاشق اعوان نے کہا کہ پی ڈی ایم کی منجدھار میں پھنسی ہچکولے لیتی کشتی سے مانگے تانگے کے ملاحوں نے چھلانگیں لگانا شروع کردیں۔
وزیر اعلیٰ پنجاب کی معاون خصوصی فردوس عاشق اعوان نے کہا کہ اے این پی نے واضح کہا پی ڈی ایم مخصوص جماعت کے ہاتھوں ہائی جیک ہوچکی ہے، پی ڈی ایم کو ذاتی ایجنڈے کے لئے استعمال کیا جارہا ہے۔
انہوں نے کہا کہ پی ڈی ایم عوام کے نام پر چند افراد کی کرپشن کے تحفظ کیلئے بنائی گئی، ملاوٹ شدہ پی ڈی ایم اتحاد میں شامل دیگر جماعتیں بھی جلد اپنی اپنی راہ لیتی نظر آئیں گی۔ پیپلزپارٹی کے گہرے زخموں کے بعد اے این پی کی جدائی نے ریٹائرڈ ہرٹ جعلی راجکماری، فسادی مولانا کا سوگ طویل کردیا۔
منجدھار میں پھنسی لڑکھڑاتی، ہچکولے لیتی پی ڈی ایم کی کشتی سے مانگے تانگے کے ملاحوں نے چھلانگیں لگانا شروع کردیں۔ اے این پی نے واضح کہا کہ پی ڈی ایم مخصوص جماعت کے ہاتھوں ہائی جیک ہوچکی ہے۔ پی ڈی ایم کو ذاتی ایجنڈے کے لئے استعمال کیا جارہا ہے!
— Dr. Firdous Ashiq Awan (@Dr_FirdousPTI) April 7, 2021