پی ٹی آئی جھنڈے کے رنگ میں صحت کارڈ کی تشہیری مہم سپریم کورٹ کے فیصلے کی خلاف ورزی قرار
اسلام آباد ( 92 نیوز) اسلام آباد ہائی کورٹ نے پی ٹی آئی جھنڈے کےرنگ میں صحت کارڈ کی تشہیری مہم سپریم کورٹ کےفیصلے کیخلاف ورزی قرار دیدی۔
پی ٹی آئی جھنڈے کے رنگ میں صحت کارڈ کی تشہیری مہم کے خلاف ن لیگ کی درخواست پر اسلام آباد ہائی کورٹ کے چیف جسٹس اطہر من اللہ نے سماعت کی اور بادی النظر میں حکومت کو سپریم کورٹ کے فیصلے کی خلاف ورزی کا مرتکب قرار دے دیا ۔
چیف جسٹس اسلام آباد ہائیکورٹ جسٹس اطہر من اللہ نے ریمارکس دیے کہ قومی خزانے سے کی جانے والی تشہیری مہم پر اپنی خود نمائی کیلئے تصویریں،فلیگ، دوسرا مواد بنانا غیر قانونی ہے۔
چیف جسٹس اطہر من اللہ نے ریمارکس دیے کہ کیوں نہ حکومت کو اس پریکٹس سے روک دیا جائے ، اور کیوں نہ سپریم کورٹ کے فیصلے کی خلاف ورزی میں ملوث افراد کے خلاف کارروائی شروع کی جائے۔
عدالت نے وزارت اطلاعات کے نمائندے کو طلب کرتے ہوئے سماعت دو ہفتے کیلئے ملتوی کردی۔
