پی ٹی آئی کے 18 جعلی اکاؤنٹس، وزراء جے آئی ٹی بنا کر مستعفی ہوں،مرتضیٰ وہاب

کراچی ( 92 نیوز) سندھ حکومت کے ترجمان نے پاکستان تحریک انصاف کے 18 جعلی اکاؤنٹس کی تحقیقات کیلئے جے آئی ٹی اور وزراء کے استعفے کا مطالبہ کردیا ۔ ترجمان سندھ حکومت مرتضیٰ وہاب کا کہنا تھا جعلی اکاؤنٹس پر پی ٹی آئی نے سب سے زیادہ شور مچارکھا تھا ، لیکن اسٹیٹ بینک کی رپورٹ نے حقیقت سب کے سامنے رکھ دی ۔ سندھ اسمبلی میں میڈیا سے گفتگو میں مشیر اطلاعات سندھ نے پی ٹی آئی پر لفظی گولہ باری کی اور آڑے ہاتھوں لیا ، مرتضیٰ وہاب نے کہا کہ پی ٹی آئی کا شور اپنی ہی آفشور کمپنی کے نیچے دب گیا  ۔ جیالے رہنماء کا کہنا تھا جعلی اکاؤنٹس پر سب سے زیادہ شور پی ٹی آئی نے مچارکھا تھا، لیکن اسٹیٹ بینک کی رپورٹ نے ان کا بھی منہ بند کردیا ، جعلی اکاؤنٹس پر  پی ٹی آئی وزراء کے استعفے دیں اور معاملے پر جے آئی ٹی بنائی جائے ۔ مشیر اطلاعات کا کہنا تھا پی ٹی آئی کے جعلی اکاؤنٹس پر پارلیمان اور سندھ اسمبلی میں آواز اٹھائیں گے ۔