پی ایس ایل فور کیلئے کراچی اسٹیڈیم دیکھ کر شاہد آفریدی بھی تعریف پر مجبور
کراچی ( 92 نیوز ) پی ایس ایل فور کے لئے کراچی اسٹیڈیم کی تیاریاں دیکھ کر شاہد خان آفریدی بھی تعریف کئے بغیر نہ رہ سکے ۔
پاکستان سُپر لیگ سیزن فور کا میلہ دبئی میں سجنے کیلئے تیار ہے ، رنگا رنگ میلے کی رونق 14 فروری سے شروع ہوگی جبکہ کراچی میں میچز کا آغاز 7 مارچ کو ہوگا اور فائنل بھی شہر قائد میں 17 مارچ کو کھیلا جائے گا ۔
کراچی کے نیشنل اسٹیڈیم میں بھرپور تیاریاں جاری ہیں اور اسٹیڈیم کو چار چاند لگانے کا مشن تکمیل کے قریب ہے ۔
نیشنل اسٹیڈیم میں رنگین کرسیاں لگانے، اور رنگ و روغن کا کام آخری مرحلے میں ہے جبکہ چھت بچھانے کا کام بھی نصف سے زائد ہوچکا ، اسٹیڈیم کی مرکزی عمارت کو سینٹرلی ایئر کنڈیشن کردیا گیا ۔
بوم بوم آفریدی بنگلہ دیش سے کراچی پہنچے تو فضاء سے ہی نیشنل اسٹیڈیم کی تصاویر کھینچ کر ٹوئٹ کردیں اور اسٹیڈیم کی خوب تعریف بھی کی ۔
شاہد آفریدی نے ٹوئٹ میں پی ایس ایل فور کا فائنل کھیلنے کی خواہش کا اظہار بھی کردیا ۔