پی ایس ایل تھری کا فائنل پچیس مارچ کو نیشنل اسٹیڈیم کراچی میں کھیلا جائے گا

کراچی ( 92 نیوز ) پی ایس ایل تھری کا فائنل 25 مارچ کو نیشنل اسٹیڈیم کراچی میں کھیلا جائے گا   ،  جس کیلئے تیاریاں عروج پر ہیں ۔   اسٹیڈیم میں ڈیڑھ ارب روپے لاگت سے ترقیاتی کام ایک ماہ میں مکمل ہونے کا امکان ہے ۔

پی ایس ایل تھری کے فائنل  کیلئے فل ڈریس ریہرسل کی بھی تیاریاں جاری ہیں ۔  کام  31 جنوری کو مکمل کیا جانا تھا  لیکن مزید ایک ماہ لگ سکتا ہے ۔

اسٹیڈیم میں وی آئی پیز کی سہولت کا بھی انتظام  کیا جارہا ہے  جبکہ 2 نئی لفٹس آئندہ ہفتے تک لگادی جائیں گی  ۔ کام مکمل ہونے کے بعد اسٹیڈیم کے بیرونی حصے کو چار چاند لگانے کا انتظام کیا گیا ہے  ۔

کھلاڑیوں کا خصوصی خیال رکھنے کیلئے ڈریسنگ روم کے واش رومز کو بھی چمکانے کا سلسلہ جاری  ہے   جبکہ جنرل انکلوژر کی تباہ حال نشستیں بھی تبدیل کی جائیں گی  ۔  پی ایس ایل فائنل کے بعد اسٹیڈیم کی چھت ڈالنے کا کام شروع ہوگا  ۔

چھت ڈالنے کیلئے مخصوص ٹیفلون شیٹ استعمال کی جائے گی  جس کیلئے ایک سال کا عرصہ درکار ہے  ۔ چھت ڈالنے کے بعد نیشنل اسٹیڈیم عالمی معیار کا ہوجائے گا ۔