پنجاب کا نیا بلدیاتی نظام ، وزیر اعظم اور کابینہ نے مسودے کی منظوری دے دی

 لاہور (92 نیوز) پنجاب کے نئے بلدیاتی نظام کیلئے وزیر اعظم اور کابینہ نے مسودے کی منظوری دے دی۔

 وزیر اعظم عمران خان کی لاہور آمد پر حکمران جماعت کے بڑے فیصلے بھی سامنے آئے۔ وزیر اعظم کی زیر صدارت اجلاس میں بلدیاتی نظام پر بریفنگ دی گئی۔

 اجلاس میں تحصیل اور میونسپل کونسل کے انتخابات جماعتی بنیادوں پر کرانے کی تجویز بھی دی گئی۔ تحصیل اور ویلیج کونسل کا نظام قائم کرنے کی تجویز بھی دی گئی ہے۔  

 اجلاس میں نئے بلدیاتی نظام میں ضلع کونسل کے نظام کو ختم کرنے کی سفارش کے علاوہ ضلع کونسل کی بجائے تحصیل کونسل کا نظام تجویز کیا گیا ہے۔

 شہروں میں میونسپل اور محلہ کونسل جبکہ دیہات میں تحصیل اور ویلیج کونسل کے علاوہ ویلیج کونسل اور محلہ کونسل کے انتخاب غیر جماعتی بنیادوں پر کرانے کی سفارش کی گئی ہے۔  

 اجلاس کے بعد میڈیا سے گفتگو کرتے ہوئے وزیر قانون راجہ بشارت کا کہنا تھا کہ وزیراعظم نے بلدیاتی نظام کے مسودے کی منظوری دے دی ہے۔ یہ مسودہ ایک مضبوط بلدیاتی نظام ثابت ہو گا۔

 وزیر قانون کا مزید کہنا تھا کہ آئندہ اجلاس میں بلدیاتی نظام کا مسودہ پاس ہو گا ، رپورٹس آئیں گی تو پولیس ریفارمز بھی کی جائیں گی۔