پاکستانی سابق کرکٹر ظہیر عباس آئی سی سی ہال آف فیم میں شامل
دبئی (92 نیوز) پاکستانی سابق کرکٹر ظہیرعباس آئی سی سی ہال آف فیم میں شامل کر لیئے گئے۔ ایشین بریڈمین ظہیرعباس اعزاز پانے والے چھٹے پاکستانی ہیں۔
ان سے قبل حنیف محمد، عمران خان، جاوید میانداد اور وسیم اکرم کو دوہزار نو ، وقار یونس کو دوہزار تیرہ میں اس اعزاز کے لیے منتخب کیا گیا۔
1969 سے 1985 تک قومی ٹیم کا حصہ رہنے والے ظہیر عباس نے اٹھتر ٹیسٹ میچوں میں5 ہزار باسٹھ رنز بنائے جس میں بارہ سنچریاں اور بیس نصف سنچریاں شامل ہیں۔ انہیں چار ڈبل سنچریاں بنانے کا اعزاز بھی حاصل ہے ۔ سابق کرکٹر دوہزار پندرہ میں آئی سی سی کے صدر بھی رہے۔
آئی سی سی ہال آف فیم میں شمولیت پر چیئرمین پی سی بی احسان مانی نے ظہیر عباس کو مبارکباد پیش کی۔ جنوبی افریقہ کے سابق کرکٹر جیک کیلس اور آسٹریلیا کی سابق آل راؤنڈر لیزا اسٹالکر بھی آئی سی سی ہال آف فیم میں شامل ہو گئے۔