پاکستان سٹیل ملز کی نجکاری پر وفاق سنجیدگی سے بات کرے : مراد علی شاہ

کراچی (92نیوز) صوبائی وزیر خزانہ مراد علی شاہ نے کہا ہے کہ سندھ حکومت نے وفاق کو پاکستان اسٹیل ملز کے لیے زمین کم قیمت پر دی تھی لہٰذا نجکاری سے قبل وفاق کو سنجیدگی سے سندھ حکومت سے بات کرنا ہو گی۔ تفصیلات کے مطابق مقامی ہوٹل میں میڈیا سے گفتگو کرتے ہوئے مراد علی شاہ کا کہنا تھا کہ سندھ حکومت کی جانب سے پاکستان اسٹیل ملز کی خریداری سے متعلق کوئی بات نہیں کی گئی۔ نجانے وفاق میں بیٹھ کر ایسی باتیں کیوں کی جاتی ہیں۔ پاکستان اسٹیل ملز کی زمین سندھ حکومت نے سبسڈائز ریٹ پر دی تھی لہٰذا نجکاری سے قبل وفاق کو سنجیدگی سے سندھ حکومت سے بات کرنا ہو گی۔ وزیر خزانہ سندھ نے ایل این جی کی درآمد کو تنقید کا نشانہ بناتے ہوئے کہا کہ اس سے ملک کے اندھیرے دور نہیں ہونگے۔ ایل این جی منصوبہ یا کوئی اور طریقہ کار بجلی کی قلت دور نہیں کرسکتا۔ سب مل کر تھر پر سرمایہ کاری کریں تو دو سو سال کے لیے بجلی کی ضروریات پوری ہو سکتی ہیں۔ مراد علی شاہ نے سندھ میں جاری بیشتر ترقیاتی منصوبوں کی تاخیر کی ذمہ داری بھی وفاقی حکومت پر ڈال دی۔