پاکستان اسٹیل ملز کے برطرف ملازموں کا کراچی میں ریلوے ٹریک پر احتجاج

احتجاج میں شریک برطرف ملازمین نے حکومت کے فیصلے کو غیر قانونی قرار دیا اور تنقید کا بھی نشانہ بنایا۔ احتجاج  کے کئی گھنٹوں بعد ڈی سی ملیر اور پولیس مظاہرین سے مذاکرات کرنے پہنچے جو کہ ناکام رہے البتہ ڈی سی ملیر گھنور خان لغاری نے امید ظاہر کی کہ حکومت  ملازمین کے جائز مطالبات کو تسلیم کرے گی۔

اسٹیل ملز ایکشن کمیٹی کے وفد نے ایم کیوایم رابطہ کمیٹی سے ملاقات بھی کی۔ ڈاکٹر خالد مقبول صدیقی نے ملازمین کےمطالبات کی مکمل حمایت کا اعلان کیا۔

دوسری جانب دھرنے کے باعث ٹرینوں کا نظام درہم برہم ہو گیا ۔ تیزگام، کراچی ایکسپریس، قراقرم کراچی نہیں پہنچ سکیں۔ کینٹ اسٹیشن سے جانے والی  نو سے زائد  ریل گاڑیاں تاخیر کا شکار ہوئی۔