پاک بحریہ کے جہاز پی این ایس ذوالفقار کا اردن کی بندرگاہ عقبہ کا دورہ
اسلام آباد (92 نیوز) پاک بحریہ کے جہاز پی این ایس ذوالفقار کا اردن کی بندرگاہ عقبہ کا دورہ، ترجمان پاک بحریہ کے مطابق میزبان بحریہ کے حکام نے پاکستانی جہاز کااستقبال کیا۔
پاک بحریہ کے ترجمان کے مطابق پی این ایس ذوالفقار کے کمانڈنگ آفیسر نے میزبان حکام سے ملاقاتیں کیں، باہمی دلچسپی کے اُمور پر تبادلہ خیال کیا گیا۔
ترجمان کے مطابق کمانڈنگ آفیسر نے امیرالبحر کی جانب سے اردن کے عوام اور بحریہ کیلٸے خیر سگالی کا پیغام بھی پہنچایا۔ اِس موقع پر مقبوضہ کشمیر میں بھارتی مظالم اور کشمیریوں کی حالت زار سے بھی اردن کے حکام کو آگاہ کیا گیا۔
ترجمان پاک بحریہ کے مطابق اردن کی رائل نیول فورس کے کمانڈر نے پی این ایس ذوالفقار کا دورہ کیا۔ پی این ایس ذوالفقار آمد پر معزز مہمان کو گارڈ آف آنر پیش کیا گیا۔ دورے کے آخر میں دونوں ممالک کے بحری جہازوں نے مشترکہ مشق میں بھی حصہ لیا۔
ترجمان کے مطابق پاک بحریہ کے جہاز کا یہ دورہ دونوں برادر ممالک بالخصوص بحری افواج کے مابین تعلقات کو مزید فروغ دے گا۔