پارٹی چیئرمین کی حیثیت سے ٹکٹ جاری کرنے کا اختیار رکھتا ہوں، راجہ ظفر الحق

اسلام آباد (92 نیوز) ن لیگی امیدواروں کی قانونی حیثیت کے تعین سے متعلق چیئرمین مسلم لیگ ن راجہ ظفر الحق نے کہا کہ پارٹی چیئرمین کی حیثیت سے ٹکٹ جاری کرنے کا اختیار رکھتا ہوں ۔
نواز شریف کی پارٹی صدارت سے نااہلی کے بعد ن لیگ کے امیدواروں کی قانونی حیثیت کے تعین کے لیے الیکشن کمیشن کا اہم اجلاس چیف الیکشن کمشنر کی سربراہی میں ہوا ۔
اجلاس میں ممبران الیکشن کمیشن، سیکرٹری الیکشن کمیشن، چاروں صوبائی الیکشن کمشنرز، ڈی جی لاء دیگر حکام نے شرکت کی ۔
دوسری جانب چئیرمین راجہ ظفر الحق کی سربراہی میں مسلم لیگ نون کے وفد نے چیف الیکشن کمشنر سے ملاقات کی ۔
اس موقع پر راجہ ظفر الحق نے میڈیا سے گفتگو کرتے ہوئے کہا کہ پارٹی چیئرمین کی حیثیت سے ان کے پاس ٹکٹ جاری کرنے کا اختیار پہلے ہی موجود ہے ۔
راجہ ظفر الحق نے بتایا کہ مسلم لیگ ن کے قائمقام صدر کے لیے مشاورت جاری ہے ۔ انہوں نے پارٹی ٹکٹ جاری کرنے سے متعلق اتھارٹی لیٹر الیکشن کمیشن میں جمع کرا دیئے ۔