ویتنام میں سیلابی ریلوں سے 9افراد ہلاک، بھارت اور چین میں بھی موسلادھار بارشیں
ویتنام ( 92 نیوز ) ویتنام میں سیلابی ریلوں اور لینڈسلائیڈنگ نے تباہی مچادی، مختلف حادثات میں 9 افراد لقمہ اجل بن گئے۔ دوسری جانب چین اور بھارت میں بھی موسلادھار بارشوں کا سلسلہ جاری ہے۔
ویتنام کے شمالی پہاڑی علاقوں میں موسلادھار بارشوں نے تباہی مچادی ، سیلابی ریلوں اور لینڈسلائیڈنگ نے ہر شے کو تہس نہس کرڈالا ہے ۔
مختلف حادثات میں 9 افراد ہلاک، 5 زخمی جبکہ 12 لاپتہ ہوچکے ہیں ، سیلابی ریلوں کے باعث سیکڑوں مکانات مسمار ، سڑکیں اور کھڑی فصلیں تباہ ہوگئیں ۔
دوسری جانب چین کے جنوب مغربی صوبہ یونان میں بھی طوفانی بارشوں نے خوفناک صورتحال اختیار کرلی ہے ، سیلاب کے باعث درجنوں عمارتیں اور کئی ایکٹر کھڑی فصلیں تباہ ہوگئی ہیں ۔
چین کے شمالی علاقہ منگولیا گرد و غبار کے طوفان کی لپیٹ میں آچکا ہے جہاں زرد ریت اور مٹی کی بلند و بالا دیوار نے ہر شے کو اپنی لپیٹ میں لے لیا ۔
بھارت کے تجارتی مرکز ممبئی میں مون سون کی بارشوں نے نظام زندگی منجمد کرڈالا ، نشیبی علاقوں میں کئی فٹ پانی کھڑا ہونے سے لوگ گھروں میں محصور ہوگئے ہیں ۔
بھارت میں تیز ہواؤں کے باعث ایک درخت گرنے سے دو افراد ہلاک جبکہ پانچ زخمی ہوئے ہیں ، محکمہ موسمیات نے بھارت میں بارشوں کا سلسلہ مزید چند روز جاری رہنے کی پیش گوئی کی ہے ۔