وزیراعظم کا غیرملکی دورہ‘ پی ٹی آئی کا رائیونڈ مارچ کی تاریخ بدلنے پر غور

اسلام آباد (92نیوز) تحریک انصاف نے رائیونڈ جانے کی تاریخ بدلنے پر غور شروع کر دیا۔ سینئر قیادت نے پارٹی چیئرمین عمران خان کومشورہ دیا ہے کہ وزیراعظم بیرون ملک جا رہے ہیں۔ ایسے میں رائیونڈ جانے کا کوئی فائدہ نہیں ہو گا۔ تفصیلات کے مطابق وزیراعظم کے غیر ملکی دورے کے باعث تحریک انصاف رائیونڈ جانے کی تاریخ بدلنے پر غور کر رہی ہے۔ پارٹی کی سینئر قیادت نے عمران خان کو مشورہ دیا ہے رائیونڈ وزیراعظم کی موجودگی میں ہی جانا سودمند ہو گا۔ کپتان نے تاریخ تبدیل کرنے کے حوالے سے صلاح و مشورے شروع کر دیے ہیں۔ حتمی فیصلہ عمران خان خود کرینگے۔ ذرائع کے مطابق تحریک انصاف رائے ونڈ میں وزیراعظم کی رہائشگاہ کا گھیراو کریگی نہ ہی وہاں دھرنا دیا جائیگا۔ تحریک انصاف رائیونڈ میں بڑا جلسہ منعقد کریگی اور احتجاج صرف جلسہ گاہ تک ہی محدود ہو گا۔ پارٹی ذرائع کے مطابق رائیونڈ جلسہ کے حوالے سے جلد پارٹی کا مشاورتی اجلاس بلایا جائیگا جس میں اہم فیصلے کئے جائینگے۔ گزشتہ روز عمران خان نے کراچی کے جلسہ میں 24مارچ کو رائیونڈجانے کا اعلان کیا تھا۔