وزیراعظم اور آرمی چیف نے سری لنکن شہری کو زندہ جلانے کو شرمناک قرار دیدیا
اسلام آباد (92 نیوز) وزیراعظم عمران خان اور آرمی چیف قمر جاوید باجوہ نے سری لنکن شہری کو زندہ جلانے کو شرمناک قرار دیدیا۔
سیالکوٹ میں مشتعل گروہ کا ایک کارخانے پر گھناؤنا حملہ اور سری لنکن منیجر کا زندہ جلایا جانا پاکستان کیلئے ایک شرمناک دن ہے۔میں خود تحقیقات کی نگرانی کر رہا ہوں اور دوٹوک انداز میں واضح کر دوں کہ ذمہ داروں کو کڑی سزائیں دی جائیں گی۔گرفتاریوں کا سلسلہ جاری ہے۔
وزیراعظم عمران خان نے سیالکوٹ میں فیکٹری پر سری لنکا کے منیجر کو زندہ جلانے کا واقعہ افسوناک قرار دے دیا، ٹویٹ میں لکھا کہ پاکستان کیلئے آج شرم کا دن ہے۔
عمران خان نے کہا کہ واقعہ کی تحقیقات کی خود نگرانی کر رہا ہوں، گرفتاریاں جاری ہیں، تمام ذمہ داروں کو قانون کے مطابق سزا دی جائے گی۔
وزیراعظم عمران خان نے ہدایت کی ہے کہ تحقیقات میں کسی قسم کی غلطی نہ ہو۔
دوسری جانب آرمی چیف جنرل قمر جاوید باجوہ نے سری لنکن فیکٹری منیجر کے قتل کو قابل مذمت قرار دے دیا۔ کہا کہ سیالکوٹ جیسے واقعات قطعی ناقابل قبول ہیں۔
آرمی چیف نے ہدایت دی جرم کے مرتکب افراد کو کیفر کردار تک پہنچانے کے لیے سول انتظامیہ کوہر ممکن مدد فراہم کی جائے۔