وزیر اعلیٰ پنجاب سے چیئرمین پیمرا کی ملاقات ، میڈیا انڈسٹری کو درپیش مسائل پر تبادلہ خیال

لاہور (92 نیوز) وزیر اعلیٰ پنجاب عثمان بزدار سے چیئرمین پیمرا سلیم بیگ کی ملاقات ہوئی جس میں میڈیا انڈسٹری کو درپیش مسائل پر تبادلہ خیال کیا گیا۔

 وزیر اعلیٰ سیکرٹریٹ لاہور میں ہونے والی ملاقات کے دوران وزیر اعلیٰ پنجاب عثمان بزدار نے اس بات پر زور دیا کہ پیمرا اور میڈیا مل کر جعلی خبروں کے خاتمے کیلئے کردار ادا کریں، جس سے بے بنیاد خبروں کی تشہیر کو روکا جا سکے۔

 وزیر اعلیٰ پنجاب نے پیمرا کی کارکردگی رپورٹ کو سراہتے ہوئے کہا کہ اس کی اشاعت سے تمام اسٹیک ہولڈرز اور حکومتی اداروں کو پیمرا کے ریگولیٹری اقدامات اور ان کے معیشت پر اثرات کا بھی پتا چل سکے گا۔

چیئرمین پیمرا سلیم بیگ نے وزیراعلیٰ پنجاب کی جانب سے پنجاب میں میڈیا انڈسٹری کیلئے اٹھائے گئے اقدامات کو سراہا۔