ورلڈ کپ 2019 کا فائنل یاد گار بنانے کیلئے منفرد اور غیر روایتی انداز اپنائے گئے
لندن ( 92 نیوز) ورلڈ کپ 2019 کا فائنل یاد گار بنانے کے لئے آئی سی سی کی جانب سے منفرد اور غیر روایتی انداز اپنائے گئے ۔
کرکٹ ورلڈ کپ کے بارہویں ایڈیشن کے فائنل کا دن بھی یادگار رہا ، خصوصی طور پر ڈیزائن کی گئی کار میں ورلڈکپ ٹرافی کو گراؤنڈ میں لایا گیا ۔
گیند کو گراؤنڈ میں پہنچانے کیلئے برٹش آرمی کے چھاتہ برداروں کی مدد لی گئی جنہوں نے گیند کو امپائر علیم ڈار کے حوالے کیا ۔
میچ سے قبل جیسن روئے اور کمار دھرما سینا نے ایک دوسرے کو گلےلگایا۔ گراؤنڈاسٹاف نے میدان میں قدم رکھے تو شائقین نے انکا بھرپور استقبال کیا ۔
لندن کا تاریخی ٹریفلگراسکوائر بھی بڑی اسکرین پر میچ دیکھنے والے شائقین کے نعروں سے گونجتا رہا ، کیویز مداحوں نے روایتی ہاکا ڈانس پیش کیا ۔
جہاں مشہور پاکستانی کرکٹ فینز چاچا کرکٹ اور چاچا زمان فائنل دیکھنے پہنچے،وہیں معروف انگلش فین گروپ بارمی آرمی بھی شائقین کا جوش بڑھاتا رہا ۔
مختلف قسم کے بہروپ دھارے شائقین اپنی اپنی ٹیموں کی بھرپور سپورٹ کرتے نظر آئے۔