نیب نے افضل کھوکھر،سیف الملوک کھوکھر کے اثاثوں کی تفصیلات حاصل کر لیں

لاہور ( 92 نیوز) نیب نے افضل کھوکھر اور  سیف الملوک کھوکھر کے اثاثوں کی تفصیلات حاصل کر لیں ۔ کھوکھر برادرن کے خلاف آمدن سے زائد اثاثوں کے کیس میں اہم پیش رفت ہوئی ہے، ذرائع کےمطابق نیب نے مسلم لیگ ن کے ایم این اےمحمد افضل کھوکھر اور ایم پی اےسیف الملوک کھوکھر کی اثاثوں کی تفصیلا ت حاصل کرلیں ۔ نیب نے ایل ڈی اے ،ایف بی آر اور دیگر اداروں سے دونوں بھائیوں کی جائیداد کا ریکارڈ حاصل کیا ، ذرائع کے مطابق ایم این اے محمدافضل کھوکھر کے نام پرمجموعی طور پر 295 کنال آٹھ مرلہ زمین ہےجسکی مالیت نوکروڑ 28 لاکھ روپے ظاہر کی گئی ہے ۔ سترہ کنال پر مشتمل نیاز بیگ پیلس،موضع جھیدو میں 39 کنال 8 مرلے زرعی زمین اور موضع مال میں 229 کنال زرعی زمین افضل کھوکھر کے نام  ہے ۔ سیف الملوک کھوکھر کے نام پرکل 902 کنال 15 مرلے کی قیمتی زمین ہے ۔  ذرائع کے مطابق  دونوں بھائیوں کے پاس کڑوروں روپے کے پرائز بانڈز اور مختلف بینکوں میں کروڑوں روپے ہیں ۔ نیب کی جانب سے متعلقہ اداروں سے حاصل ہونے والے ریکارڈ کا جائزہ لیا جارہا ہے، جلد دونوں بھائیوں کو نیب میں طلب کر کے بیانات قلمبند کئے جائیں گے۔