نیا عالمی مالیاتی اسکینڈل ’فن سین‘سامنے آ گیا

 واشنگٹن (92 نیوز) امریکی ادارے فِن سن فائلز کا عالمی مالیاتی اداروں کے گورکھ دھندے کے حوالے سے بڑا انکشاف ہو گیا۔ عالمی بینکوں کے ذریعے منی لانڈرنگ اور فراڈ کی رقوم کی منتقلی کا تہلکہ خیزاسکینڈل سامنےآ گیا۔ منی لانڈرنگ اور ٹیرر فنانسنگ کی روک تھام کا ڈھول پیٹنے والے خود غیرقانونی کاروبارمیں ملوث نکلے۔ مالیاتی جرائم کی تحقیقات کرنے والے امریکی ادارے فِن سن کی لیک  ہونیوالی دستاویزات سے  یہ سامنے آیا ہے کہ کیسے دنیا کے سب سے بڑے بینکوں کے ذریعے کالا دھن سفید کیا گیا۔ دستاویزات کے مطابق ایچ ایس بی سی نے اپنے امریکی کاروبار کے ذریعے دو ہزار تیرہ اور دوہزار چودہ میں کروڑوں ڈالرز ہانگ کانگ کے اکاؤنٹس میں منتقل کئے ۔ دستاویزات میں مزید انکشاف کیا گیا ہے کہ امریکہ کے سب سے بڑے بینکوں میں سے ایک بینک نے ایک بدنامِ زمانہ مجرم کو ایک ارب ڈالر سے زائد رقم منتقل کرنے میں مدد کی۔ فائلوں سے یہ بات سامنے آئی ہے کہ سرمایہ کاری کا یہ فراڈ بینک پر امریکہ میں منی لانڈرنگ کی وجہ سے ایک اعشاریہ نو ارب ڈالر کا جرمانہ عائد ہونے کے بعد شروع ہوا تھا۔ خفیہ دستاویزات میں انکشاف ہوا ہے کہ صرف متحدہ عرب امارات میں موجود گونز جنرل ٹرینڈنگ نامی کمپنی نے سوا چودہ کروڑ ڈالرز کی مشکوک منتقلی کی۔ حتیٰ کہ امارات کا مرکزی بینک پابندیوں کے باوجود ایران کو رقوم کی منتقلی روکنےمیں ناکام رہا۔ فن سن فائلز دو ہزار چھ سو ستاون لیک شدہ دستاویزات ہیں، جن میں اکیس سو دستاویزات مشتبہ سرگرمیوں کے بارے میں ہیں۔ دستاویزات میڈیا ادارے بزفیڈ کی ویب سائٹ کو لیک کی گئیں اور ان کا تبادلہ تحقیقاتی صحافیوں کی بین الاقوامی تنظیم آئی سی آئی جے کے ساتھ کیا گیا۔