ملک بھر میں پانی کے بحران نے سر اٹھالیا، پنجاب کا نہریں بند کرنے کا فیصلہ

اسلام آباد ( 92 نیوز )ملک بھرمیں پانی کے بحران نےسراٹھا لیا۔ پنجاب نے آبپاشی کےلئے تمام نہریں بند کرنے کا فیصلہ کرلیا ۔ گریٹر تھل کینال کے علاوہ دوامی اور غیر دوامی نہروں کا پانی آج سے روک دیا جائے گا۔
بارشوں میں کمی کے باعثپانی کا بحران سنگین صورتحال اختیار کر گیا ۔ صوبوں نے گندم کی فصل کو بچانے کےلئے ایمرجنسی پلان پر عملدرآمد شروع کردیا۔
ذرائع کے مطابق صوبہ پنجاب نے آبپاشی کیلئے تمام نہریں بند کرنے کا فیصلہ کر لیاہے ۔ گریٹر تھل کینال کے علاوہ پنجاب کی دوامی اور غیر دوامی نہریں آج سے بند کر دی جائینگی جو 16نومبر تک بند رہیں گی ۔ پنجاب کو 6ہزار کیوسک ، سندھ کو40ہزار ، بلوچستان کو5ہزار اور خیبرپختونخوا کو 3ہزار کیوسک پانی فراہم کیا جا رہا ہے۔
دوسری جانب ڈیموں میں پانی کا ذخیرہ خطرناک حد تک کم ہو گیاہے ۔ ملک بھر میں پانی کا ذخیرہ صرف50لاکھ ایکڑ فٹ رہ گیا ۔ پانی محفوظ کرنے کےلئے تربیلا اور منگلا ڈیم سے پانی کا اخراج کم کر دیاگیا ہے ۔
تربیلا ڈیم سے پانی کا اخراج 40ہزار اور منگلا ڈیم سے 30ہزار کیوسک ہے ۔
ذرائع کے مطابق پانی کے اخراج میں کمی سے تربیلا ڈیم میں بجلی پیدا کرنے والے4 یونٹ بھی بند ہیں ۔ جس کے بعد تربیلا ڈیم سے بجلی کی پیداوار کم ہو کر 1ہزار302 میگاواٹ رہ گئی ہے۔