ملتان، ٹکٹوں کی تقسیم پر پی ٹی آئی کی خواتین کا شاہ محمود کی رہائشگاہ کے باہر احتجاج
ملتان ( 92 نیوز) ٹکٹوں کی تقسیم پر پاکستان تحریک انصاف کی خواتین بھی تقسیم ہو گئیں ، ناراض خواتین نے ملتان میں شاہ محمود قریشی کے گھر کے باہر احتجاجی مظاہرہ کیا ۔
ٹکٹوں کی تقسیم،تحریک انصاف کی مشکلات کم نہ ہوئیں، ملتان میں خواتین ورکرز نے شاہ محمود قریشی کی رہائش گاہ کے باہر احتجاجی دھرنا دیا ، دھرنے میں اُس وقت دلچسپ صورتحال پیدا ہو گئی جب احتجاج کرنے والی خواتین کے دو گروپ آپس میں ہی گتھم گتھاہو گئے ۔
خواتین کے دونوں گروپس نے ایک دوسرے کے خلاف ڈنڈوں اور مکوں کا آزادانہ اور بھر پور استعمال کیا ، ایک خاتون بے ہوش گئی جبکہ ایک زخمی ہوئیں ۔خواتین نے ایک دوسرے پر الزامات کی بوچھاڑ کر دی ۔
ادھر کراچی میں بھی پی ٹی آئی کے ناراض کارکن سراپا احتجاج بن گئے ، کراچی کے حلقہ پی ایس 118سے ٹکٹ دے کر واپس لینے پر اسدامان کی جانب سے عارف علوی کی رہائشگاہ کے باہر کھلاڑی اکٹھے ہوئے اور شدید احتجاج کیا ۔
شرکا نے ٹکٹوں کی غیر منصفانہ تقسیم کے خلاف پوسٹرز بھی اٹھا رکھے تھے۔
