مقتول نقیب اللہ کے والد کی قیام امن پر پاک فوج کی تعریف
اسلام آباد ( 92 نیوز) مقتول نقیب اللہ محسود کے والد محمد خان کو انصاف کی امید ہے ، ویڈیو پیغام میں کہا کہ کیس کو ذاتی مفاد یا کسی کے خلاف استعمال کرنے سے اصل مقصد پیچھے چلا جائے گا ، محمد خان نے ملک میں امن و امان کے قیام کے لئے پاک فوج کی بھی تعریف کی ۔
والد نقیب اللہ کا کہنا تھا کہ سیاسی جماعتوں کو وردی کیخلاف نعرے لگانے کی اجازت نہیں دی جا سکتی ، وزیراعظم، چیف جسٹس اور آرمی چیف اپنے وعدے ضرور پورے کریں گے ۔
مقتول نقیب اللہ محسود کے والد محمد خان نے کیس سے متعلق خصوصی گفتگو کرتے ہوئے کہا کہ جلد یہ کیس منطقی انجام تک پہنچے گا ، انسداد دہشت گردی عدالت نے ضمانت منسوخ کرکے ملزموں کو جیل بھیج دیا ۔
محمد خان محسود کا کہنا تھا کسی کی نیت پر کوئی شک نہیں ، نقیب کے نام پر کسی کو فنڈ اکٹھے کرنے کی اجازت نہیں دی ، جو بھی اس کیس کو ذاتی مقاصد کے لئے استعمال کرے گا اس کا خود ذمہ دار ہے ۔
محمد خان کا کہنا تھا کہ پشتون قوم پاکستان کا حصہ ہے اور پاک فوج اس کی بھی محافظ ہے ، سیاسی جماعتوں کو وردی کیخلاف نعرے لگانے کی اجازت نہیں دی جا سکتی ، پاک فوج کے خلاف بات کرنے والا اصل میں پاکستان کا مخالف ہے ۔