مشتاق رئیسانی کے سہولت کار کی بیکری سے 57لاکھ روپے اور زیورات برآمد
کوئٹہ (92نیوز) بلوچستان کا میگا کرپشن کیس رفتہ رفتہ آگے بڑھنے لگا۔ وقت گزرنے کے ساتھ ساتھ نئے نئے انکشافات منظرعام پر آنے لگے۔ گرفتار سہولت کار کی نشاندہی پر بیکری سے لاکھوں روپے‘ زیورات اور جائیداد کی دستاویزات برآمد کر لی گئیں۔
نیب بلوچستان کے ترجمان کے مطابق سابق سیکرٹری مشتاق رئیسانی کے ساتھ سہولت کار کے طور پر کام کرنے والے گرفتار اسد شاہ نے دوران تفتیش انکشاف کیا کہ کروڑوں روپے ہنڈی کے ذریعے دبئی بھجوائے گئے اور جس شخص کے ذریعے یہ رقم قندہاری بازار سے بھجوائی گئی وہ بھی غائب ہے جس کی گرفتاری کے لئے چھاپے مارے جارہے ہیں۔
اسد شاہ کی نشاندہی پر سیٹلائیٹ ٹاون کی بیکری پر چھاپہ مارا گیا اور اس میں چھپائے گئے 57 لاکھ روپے، غیرملکی کرنسی، زیورات اور کچھ دستاویزات بھی برآمد کی گئیں۔ گرفتار سہولت کار نے مزید انکشاف کیا ہے کہ ایک اہم شخصیت کے باورچی کے اکاونٹ میں بھی کروڑوں روپے ٹرانسفر کئے گئے ہیں جس کی تحقیقات کی جا رہی ہیں۔