مدینہ ٹیچنگ اسپتال میں کورونا ریسرچ سنٹر کا باقاعدہ افتتاح

فیصل آباد (92 نیوز) مدینہ ٹیچنگ اسپتال فیصل آباد کا ایک اور احسن اقدام، یونیورسٹی آف ہیلتھ سائنسز کے زیراہتمام کورونا پر سب سے بڑے ریسرچ پراجیکٹ کے تحت مدینہ ٹیچنگ اسپتال میں بھی ریسرچ سنٹر قائم کر دیا گیا، جس کا باقاعدہ افتتاح کیا گیا۔ کورونا کی تیزی سے پھیلتی وباء اور اس پہ ناکافی تحقیق کے پیش نظر مدینہ ٹیچنگ اسپتال ایک قدم اور آگے بڑھا اور یونیورسٹی میں ریسرچ سنٹر قائم کر دیا۔ ریسرچ سنٹر کا افتتاح یونیورسٹی آف ہیلتھ سائنسز کے وائس چانسلر پروفیسر ڈاکٹر جاوید اکرم اور چئیرمین بورڈ آف گورنر دی یونیورسٹی آف فیصل آباد حیدر امین نے کیا، یونیورسٹی کے پروریکٹر ڈاکٹر محمد سعید، ریکٹر ڈاکٹر شوکت پرویز، ایم ایس مدینہ ٹیچنگ اسپتال و دیگر ماہرین بھی شریک تھے، مہمان خصوصی نے اس کاوش کو خوب سراہا۔ تقریب میں شرکاء کو بتایا گیا کہ ریسرچ سنٹر میں کورونا کے حوالے سے تحقیقی کام شروع کیا جا رہا ہے،، مدینہ اسپتال نے پہلے ہی 150 بیڈز کورونا مریضوں کیلئے مختص کئے، اس موقع پر مریضوں کا علاج کرنیوالے ڈاکٹرز کو کوٹ پہنائے گئے، اور انہیں خصوصی پیغام دیا۔ پروفیسر جاوید اکرم نے کہا کہ کورونا کے علاج اور مختلف ادویات کے مریضوں پر اثرات اور افادیت جانچنے کیلئے ریسرچ سینٹر کا قیام سود مند ثابت ہو گا۔ ایم ایس مدینہ ٹیچنگ اسپتال کا کہنا تھا کہ ہم یونیورسٹی آف ہیلتھ سائنسز کا حصہ، ذمہ داری پوری کریں گے۔