لاہور: زہریلی مٹھائی کھانے سے متاثرہ خاتون زندگی کی بازی ہار گئی، جاں بحق افراد کی تعداد انتیس

لاہور (نائنٹی ٹو نیوز) لیہ میں زہریلی مٹھائی کھانے سے متاثرہ خاتون لاہور کے جناح ہسپتال میں زندگی کی بازی ہار گئی جس کے بعد سانحے میں جاں بحق افراد کی تعداد انتیس ہو گئی ہے۔ وزیراعلی پنجاب کی ہدایت پر لیہ میں مٹھائی کھانے سے متاثرہ نو افراد کو نشتر ہسپتال ملتان سے ایمبولینسوں کے ذریعے لاہور کے جناح ہسپتال  منتقل کیا گیا تھا۔ بدھ کی صبح نصرت بی بی حالت خراب ہونے کے باعث زندگی کی بازی ہار گئی جس کے بعد اس واقعے میں مرنے والے افراد کی تعداد انتیس ہو گئی ہے۔ گزشتہ رات مزید نو مزید متاثرہ افراد  کو جناح ہسپتال میں منتقل کیا گیا ہے۔ اس وقت ہسپتال میں مٹھائی کھانے سے متاثرہ سترہ مریض زیرعلاج ہیں۔ وزیراعلی پنجاب کی ہدایت پر جناح ہسپتال میں متاثرہ افراد کو خصوصی وارڈ میں رکھا گیا ہے۔ دوسری جانب پنجاب فوڈ اتھارٹی کی جانب سے واقعہ کی تحقیقاتی رپورٹ آج وزیراعلیٰ پنجاب کو پیش کی جائے گی جبکہ ٹیم نے علاقہ مکینوں کے بیانات اور متاثرین کا ریکارڈ قبضے میں لے لیے ہیں۔