قائم مقام صدر رضاربانی‘ گورنر اور وزیراعلیٰ سندھ کی مزارقائد پر حاضری

کراچی (92نیوز) بانی پاکستان قائد اعظم محمد علی جناح کی برسی پر قائم مقام صدر رضا ربانی، گورنر اور وزیراعلیٰ سندھ سمیت دیگر اہم شخصیات نے مزار قائد پر حاضری دی اور فاتحہ پڑھی۔ تفصیلات کے مطابق بابائے قوم قائداعظم محمد علی جناح کی اڑسٹھ ویں برسی پر قائم مقام صدر رضاربانی نے مزار قائد پر فاتحہ خوانی کی اور پھولوں کی چادر چڑھائی۔ ان کا کہنا تھا پوری قوم قائد اعظم کی گیارہ اگست کی تقریر کو عملی جامہ پہنانے کے لیے تجدید عہد کرے۔ کشمیر میں انسانی حقوق کی پامالی پر انہوں نے عالمی برادری سے بھارت پر دباو ڈالنے کا مطالبہ کیا۔ قائمقام صدر نے کہا کہ قومی اداروں کے استحکام اور آئین پر سختی سے عمل پیرا ہونے سے جمہوریت مزید مضبوط ہوگی۔ گورنر سندھ ڈاکٹر عشرت العباد خان کہتے ہیں قوم بانی پاکستان کی پرامن جدوجہد کو کبھی نہیں بھولے گی۔ مسلح افواج کے نمائندوں‘ وزیراعلیٰ سندھ مراد علی شاہ، صوبائی کابینہ اور ڈپٹی مئیر ارشد وہرا‘ دیگر اہم شخصیات سمیت عوام کی بڑی تعداد نے مزار قائد پر حاضری دی اور فاتحہ خوانی کی۔