فضل الرحمان کی زیر صدارت 5جماعتی اپوزیشن کا اجلاس،امیدوار برقراررکھنے کافیصلہ

اسلام آباد( 92 نیوز) مولانا فضل الرحمن کی رہائش گاہ پر پانج جماعتی اپوزیشن جماعتوں کا اجلاس ہوا ، اجلاس کی صدارت مولانا فضل الرحمن نے کی ، اجلاس میں  صدر کے انتخابات کیلئے اپنا امیدوار دستبردار نہ کرنے کا فیصلہ کیاگیا۔ اجلاس کے بعد میڈیا سے گفتگو کرتے ہوئے  پاکستان مسلم لیگ ن کے رہنما سردار ایاز صادق نے کہا کہ پیپلز پارٹی کے لوگوں نے وعدہ کرکے شہباز شریف کے نام پر اتفاق نہیں کیا ، پیپلز پارٹی نے اپوزیشن کی مشاورت کے بغیر اعتزاز احسن کا نام تجویز کر دیا۔ مولانا فضل الرحمان نے کہا کہ آصف علی زرداری سے ملاقات ہوئی ، ان سے  درخواست کی کہ وقت کم ہے ، اپوزیشن کا ایک امیدوار ہونا چاہئے ،اعتزاز احسن کے بارے زمینی حقیقت یہ ہے کہ پوری اپوزیشن ایک پارٹی کے امیدوار کے حق میں دستبردار نہیں ہوسکتی ۔ مولانا فضل الرحمان نے مزید کہا کہ میں بات چیت کر کے اپنا فرض پورا کر چکا ہوں ،متحدہ اپوزیشن کا متفقہ صدارتی امیدوار فضل الرحمن ہی ہے ، سب نے یہی کہا کہ فضل الرحمان ہی اپوزیشن کے امیدوار ہیں ۔