عوام کی زندگی میں ہر ممکن سہولیات لانے کیلئے سرگرم عمل ہیں، شبلی فراز

اسلام آباد (92 نیوز) وفاقی وزیر اطلاعات شبلی فراز کہتے ہیں کہ عوام کی زندگی میں ہر ممکن سہولیات لانے کیلئے پرعزم اور سرگرم عمل ہیں۔

عوام کی زندگی میں ہر ممکن سہولیات لانے کیلئے پرعزم اور سرگرم عمل ہیں۔چینی کی قیمت میں کمی عمران خان کا غریب کو ریلیف دینے کے عزم کا واضح اظہار ہے۔کرونا وباء کے باوجود عمران خان کی دانشمندانہ حکمت عملی کی بدولت پاکستان کی معیشت وروزگار رواں اورانسانی زندگیاں محفوظ رہیں۔

— Senator Shibli Faraz (@shiblifaraz) December 13, 2020

شبلی فراز نے ٹویٹ میں لکھا کہ کورونا وباء کے باوجود عمران خان کی دانشمندانہ حکمت عملی کی بدولت پاکستان کی معیشت اور روزگار رواں دواں اور انسانی زندگیاں محفوظ ہیں۔

وزیراعظم عمران خان کی قیادت میں حکومت عوام کے روشن مستقبل کے لئے کوشاں ہے، ترقی کا یہ سفر اسی رفتار کے ساتھ جاری رہے گا۔

— Senator Shibli Faraz (@shiblifaraz) December 13, 2020

اُنہوں نے لکھا کہ چیلنجز کے باوجود پاکستان کے معاشی اشاریے مثبت ہیں، مالی سال کی پہلی ششماہی میں ترسیلات زر میں 27 فیصد، غیر ملکی براہ راست سرمایہ کاری میں 150 فیصد اور سیمنٹ کی پیداوار میں 17 فیصد اضافہ ہوا ہے۔ نومبر میں کار سیل میں 68 فیصد اضافہ ہوا۔ ٹریکٹرز، موٹر سائیکلز کی فروخت میں بھی واضح اضافہ ہوا۔

ٹویٹ میں مزید لکھا کہ وزیراعظم عمران خان کی قیادت میں حکومت عوام کے روشن مستقبل کے لئے کوشاں ہے، ترقی کا یہ سفر اسی رفتار کے ساتھ جاری رہے گا۔

اس سے دو روز قبل شبلی فراز کا پریس کانفرنس میں کہنا تھا نوازشریف، آصف زرداری اور فضل الرحمٰن کرپشن کے سلطان ہیں۔ لوگوں کو بیچنا اور خریدنا اِن کے ادوار میں شروع ہوا۔ انہوں نے ایسا ماحول بنایا جس میں صرف پیسے والے لوگ سیاست کرسکیں، ذاتی کرپشن کو ٹھنڈا کرنے کے لیے کرپشن کے نئے لیول بنائے۔ اُنہوں نے پیسہ باہر کے ممالک میں بھیجا اور باہر ہی جائیدادیں خریدیں۔

انہوں نے کہا اِن سب کے راستے اور منزلیں بھی مختلف ہیں، اگر انہیں راستہ چاہئے ہے تو ہم انہیں دے دیں گے لیکن این آر او نہیں دیں گے۔ اب یہ آر پار کی باتیں کرنے لگے ہیں، یہ جانتے ہیں ان کی سیاست ہمیشہ کے لیے دفن ہونے والی ہے، انہوں نے استعفوں کا ڈھونگ رچایا ہے، یہ دے دیں استعفے ہم پر کوئی پریشر نہیں۔

وفاقی وزیر کا کہنا تھا کہ اپوزیشن کے کچھ ایم این ایز ہمارے ساتھ رابطے میں ہیں، اپوزیشن سے کہتا ہوں جلسے دو تین مہینے کیلئے ملتوی کر دیں۔ غیرذمہ دارسیاسی جماعتوں کا اکٹھ اور سرگرمیاں بھی کورونا کے اضافے کا باعث بنیں گی۔