عوام کو ریلیف فراہم کرنے کیلئے مختلف تجاویز زیر غور ہیں، شہزاد اکبر
اسلام آباد (92 نیوز) وزیراعظم کے معاون خصوصی شہزاد اکبر نے کہا ہے کہ ریاست ایک ایک کے گھر جاکر سہولیات فراہم نہیں کرسکتی۔ عوام کو ریلیف فراہم کرنے کیلئے مختلف تجاویز زیر غور ہیں۔
اسلام آباد چیمبر آف کامرس اینڈ انڈسٹری نے کورونا وائرس کی وجہ سے مشکلات کا شکار غریب عوام میں مفت راشن کی تقسیم کا عمل شروع کر دیا۔ تقریب سے خطاب کرتے ہوئے وزیراعظم کے معاون خصوصی برائے احتساب و داخلہ مرزا شہزاد اکبر نے کہا کہ حکومت کی حکمت عملی ہے کہ کورونا کو بھی کنٹرول کیا جائے اور کاروباری سرگرمیوں کو بھی متاثر ہونے سے بچایا جائے۔ کنسٹرکشن اور اس سے منسلک دیگر انڈسریز کو بتدریج کھولنے کیلئے ایس او پیز بنا رہےہیں۔
شہزاد اکبر نے کہا کہ امپورٹرز سمیت ہوٹل انڈسٹری کی مشکلات کو کم کرنے کیلئے بھی حکومت غور کر رہی ہے۔ تاجر برادری کو کرایوں اور یوٹیلیٹی بلوں میں ریلیف فراہم کرنے کی تجویز بھی زیر غور ہے۔
اسلام آباد پولیس کے انسپکٹر جنرل محمد ذوالفقار خان اور ڈپٹی کمیشنر اسلام آباد حمزہ شفقات بھی تقریب میں موجود تھے۔