عاشقان مصطفی ﷺ جشن ولادت منانے کی تیاریوں میں مگن
لاہور ( 92 نیوز ) ماہ ربیع اول کا چاند نکلنے کے بعد سے عاشقان محمد مصطفی ﷺ جشن ولادت رسول ؐ منانے کی تیاریوں میں بھرپور انداز سے مگن ہیں ۔
عشق رسول ؐ سے سرشار ، خواتین ، بچے اور بزرگ سب یوم ولادت رسول ﷺ کی تیاریوں میں مصروف ہیں ۔ اس سلسلے میں گلیوں ، بازاروں کو سجانے کا سلسلہ جاری ہے جب کہ اسی مناسبت سے اشیا کی فروخت کے لئے اسٹالز سے سامان بھی ہاتھوں ہاتھ فروخت ہو رہاہے ۔
گلی ،محلوں اور بازاروں میں لگے اسٹالز پر جھنڈیاں ، سبز جھنڈے ، شبیہہ نعلین پاک کے بیجز ، محرابوں سمیت مختلف اقسام کا سامان دستیاب ہے ۔
عاشقان مصطفی ؐ جہاں گلی محلوں کو سجانے میں مصروف ہیں وہیں در و دیوار درود و شریف اور ثناء مصطفی سے گونج رہے ہیں ۔ ہر گھر میں عقیدت نچھاور کرنے کا سلسلہ جاری ہے اور ہر کوئی اپنی استطاعت کے مطابق یوم ولادت رسول ﷺ کیلئے بڑھ چڑھ کر حصہ لے رہا ہے ۔
ملک کے تمام شہروں اور دیہی علاقوں میں محفلوں کا بھی انعقاد کیا جا رہا جن میں علماء کرام نبی آخرالزمان حضرت محمد ﷺ کی شان میں گلہائے عقیدت پیش کرر ہے ہیں ۔