شہریارآفریدی کااورکزئی ایجنسی کا دورہ،سانحہ کلایہ کے شہدا کے ورثا سے تعزیت
پشاور ( 92 نیوز) وزیر مملکت برائے داخلہ شہریار آفریدی نے اورکزئی ایجنسی کا دورہ کیا اور کلایہ بم دھماکے میں شہید ہونے والوں کے لواحقین سے اظہار تعزیت کیا۔ شہر یار آفریدی نے کوہاٹ میں اورکزئی دھماکے کے زخمیوں کی عیادت بھی کی۔
وزیر مملکت برائے داخلہ شہریار آفریدی ہیلی کاپٹر کے ذریعے اورکزئی ایجنسی کے دورے پر کلایا پہنچے جہاں انہوں نے کلایا بازار دھماکے میں شہید ہونے والوں کے لواحقین سے تعزیت کی۔ اورکزئی سکاؤٹ کلایہ کے کمانڈر بریگیڈئیرشہزاد اکرم بھی وزیر مملکت کے ہمراہ تھے۔
اورکزئی کے دورے کے بعد وزیر مملکت ڈسٹرکٹ ہیڈ کوارٹر اسپتال پہنچے اور کلایہ بم دھماکے کے زخمیوں کی عیادت کی ۔
شہریار آفریدی کا کہنا تھا کہ زخمیوں کے علاج میں کسی قسم کی غفلت برداشت نہیں کی جائے گی، ان کا کہنا تھا کہ اورکزئی بم دھماکے کی تفتیش جدید خطوط پر جاری ہے۔
